Lazans transpor lo later i kontinyen avek zefor pour amelyor sitiasyon trafik |10 January 2017

An 2015, gouvernman ti anons en nouvo plan trafik pour Victoria, oubyen ‘Victoria Traffic Management Plan’ parey i apele an Angle. Premye faz sa plan ki konport trwa faz – kour-term, mwayen-term e lon-term – in deza konmans ganny enplimante e in konsiderableman amelyor sirkilasyon trafik dan Victoria.

Travay ki’n deza konplete

Travay ki’n deza konplete i enkli lenstalasyon plis lalimyer trafik ek koulwar ki’n azoute dan serten semen. Sa i sirtou lo Laveni 5 Juin, dan Lari Albert, Lari Olivier Maradan, krwaze Bel Eau ek Bel Air, Plaisance ek Roche Caiman.

Sa premye faz in osi konpri konstriksyon ronpwen Union Vale kot Radyo Sesel, amelyorasyon ronpwen Le Chantier, konstriksyon parking kot lekol Bel Eau, fer trafik diriz dan en sel direksyon Lari Francis Rachel pou al ver sant lavil e sanz direksyon trafik lo Lari Castor pou al ver Anse Etoile.

Proze ki pou terminen byento

De lyen pe aktyelman ganny konstrir avek Ile Soleil. Enn pour konnekte avek en krwaze kot bazar aktyel Anse Aux Pins. Pon ki pou permet sa konneksyon in fini konstrir. Lot pou zwenn avek bout erport, Anse Faure. En lot lyen pou konstrir plitar dan zanmerant Care Free Guest House.

Konstriksyon en pon ant Ile Persévérance ek Ile Aurore in fini konplete e sa poupermet en lot lyen ant Victoria ek Anse Etoile kot bazar i ete konmela, an pasan par sa de zil konble. Apartir Ile du Port, sa semen pou konnekte avek semen Vye Por par pon ki pe konstrir kot batiman Espace. Sa proze i sipoze terminen mwan prosen.

Nouvo proze ki pou demare byento

En proze enportan ki pou konmanse ver milye Fevriye pou konnekte semen Vye Por - ant Amusement Centre ek Batiman zournal ‘Seychelles NATION’ a Laveni Bois de Rose. Par sa nouvo semen ki pou pas paralel avek Laveni Cinq Juin, lo ansyen Zarden Zanfan e ziska Maison du Peuple, parti Les e Nores Mahé pou direkteman konekte. Sa i vedir ki trafik ki sorti dan Sid pou al dan direksyon Anse Etoile pa pou bezwen pas dan sant lavil e visversa. Sa nouvo semen i sipoze ouver ver lafen Mars.

Dan limedya, en lot proze ki konsern sa semen e ki’n bidzete pour 2017 se en ronpwen ki pou sitye devan STC Hypermarket. En nouvo semen sorti kot laboutik Weeling Mont Fleuri pou osi vin konnekte avek sa ron pwen. Departman Transpor lo Later in osi prevwar en ‘lay by’ lo sa semen vizavi Lekol Enternasyonal.  Sa a permet bann paran depoz zot zanfan la, e al lekol an pasan lo en pon ki pou ganny konstrir. Sa bann nouvo devlopman lo semen Bois de Rose, enkli en pasaz pyeton ki pou ganny azoute,  a permet minimiz risk pour pyeton ki pe deza koup semen la, e dekonzeste trafik lo semen Mont Fleuri.

Avek bi rezourd problenm sirkilasyon trafik Pointe Larue ek Anse Aux Pins ki prensipalman koze par plizyer krwaze, bus stop, lekol ek biznes lo sa semen, en ron pwen pou konstrir dan larantre erport an Fevriye.

En trwazyenm vwa lo Lari Francis Rachel i en lot proze ki kapab realize sa lannen. Sa a permet trafik pour sorti depi kot lorloz e al ver Sid. Kontrerman a sa ki serten komanter sirtou lo medya sosyal pe fer, sa nouvo koulwar pa pou afekte Fiennes Esplanade, ni son trotwar e ni bann kyosk souvenir devan karpark Stad Popiler.

Lezot proze ki pou enplimante dan sant lavil i enkli met lalimyer trafik dan krwaze Bel Eau, met de koulwar avek trotwar Lari Hangard, Lari Quincy ek Lari St Joseph. Lo sa enn semen, travay in deza konmanse e Departman Transpor lo Later pe esper konstriksyon parti en batiman fini pour kapab konplet li.

An sa ki konsern Laveni Revolisyon, in prevwar ki i pou annan trwa koulwar, avek enn ki pou ganny azoute ant krwaze Bel Eau ek lekol Belonie.

Lazans Transpor lo Later pe osi prevwar bann mezir pour amelyor trafik dan krwaze Bel Air e dan Lari Labourdonnais. Sa lazans pe osi konsider anmenn amelyorasyon kot ronpwen Plaisance.

Proze mwayen e lon-term

Parmi bann gran plan mwayen-term, Laveni Bois de Rose pou vin en semen kat vwa e pou kontinyen pour konnekte avek highway Providence. Pour evit risk aksidan, larantre ‘Intelvision’, ‘Airtel’ ek lezot biznes dan sa rezyon pou apartir en nouvo semen paralel, e ki – kontrerman a konmela - pou konnekte avek grannrout a en sel pwen. Sa proze i sipoze konplete an 2019.

Pour bann ki sorti Beau Vallon ek St Louis, i annan posibilite pour en nouvo bypass ki a zwenn Stevenson Delhomme ek Bel Air. Letan i ti prezant sa plan an 2015, Lazans Transpor lo Later ti anonse ki serten porsyon semen St Louis pou grandi, an partikilye dan krwaze Stevenson Delhomme. Semen Stevenson Delhomme limenm pou osi grandi.

An se ki konsern konzesyon trafik depi Au Cap ziska erport sirtou dan bomaten, en proze amelyorasyon sa semen ou menm konstriksyon nouvo semen apartir Ile Soleil pe ganny konsidere.

An zeneral an se ki konsern semen, Lazans Transpor lo Later pe konsider fer tou semen vin sis met larzer kot i neseser. I pe osi konsider anpes konstriksyon lo bann morso later kot bann nouvo semen i kapab pase.

Dan lefitir, i pou osi annan nesesite revwar sistenm e pri parking dan Victoria. Gouvernman pe menm etidye posibilite pour ki serten veikil ki zot prezans dan Victoria pa endispansab i pey en tiket pour antre dan lavil. I pe osi revwar lezislasyon pour asire ki konstriksyon bann nouvo batiman i fer provizyon pour parking.

Plan Trafik Victoria pe ganny enplimante an kordinasyon avek Minister Labita, Lenfrastriktir ek Transpor lo Later, ki li i annan en plan zeneral pour devlopman lavil ki ganny konsidere konman pli pti kapital dan lemonn.

Dan son lansanm, sa proze i ekspekte konplete selman apre en peryod 6-an. Sa lenvestisman mazer i reprezant en kou total 2.1 bilyon roupi.