STC supermarket pou fermen tanporerman • Pou reouver dan en pli pti batiman le 1e Fevriye |01 December 2016
Seychelles Trading Company (STC) in anonse ki son supermarket ki sitie dan sant Victoria pou fermen byento.
Aparti le 1e Fevriye 2016, sa lakonpannyen pou ouver en pli pti magazen dan en landrwa ki pa tro lwen avek sa enn aktyel.
Supermarket STC i sipoze fermen aparti le 31 Desanm sa lannen, me dapre sef egzekitif (CEO) sa lakonpannyen Veronique Laporte, sa i menm kapab arive avan.
In eksplike ki sa i akoz vi son laz e son leta avarye, sa batiman in deza ganny kondannen par enzennyer e ki sirtou zot pe ganny problenm pour kontrol lera ki antre anndan, malgre zefor pour anpes sa.
Manmzel Laporte in presize ki sa problenm lera i lye avek lakantite sa pes ki annan dan Victoria e move leta sa batiman limenm ki permet zot antre.
Me i’n dir ki STC pe donn son bann kliyan loportinite pour kontinyen fer zot konmisyon dan supermarket otan ki sa i posib, amwen ki sitiasyon i fors zot pour fermen avan le 31 Desanm.
In azoute ki sa desizyon pou osi depan lo konsiltasyon ki STC i an se moman annan avek Lotorite Lasante Piblik.
Ziska le 1e Fevriye kan STC pou ouver sa nouvo pti supermarket anvil, bann kliyan pe ganny ankouraze pour fer zot shopping kot hypermarket lo laveniBois de Rose. Se ankor dan 2-an, apre ki nouvo batiman in konplete, ki nouvo supermarket i ekspekte reouver.
STC in dir ki depi 2013 i ti’n deside pour kraz sa batiman ki’n la pour plis ki 50-an e ranplas li par en lot nef. Sa se enn bann rezon akoz sa lakonpannyen ti deside pour ouver son hypermarket.
Son sef egzekitif in sepandan eksplike ki zot in bezwen retard son fermtir akoz bokou kliyan in reste fidel a sa landrwa e zot in kontinyen fer zot konmisyon laba.
Malgre fermtir tanporer son supermarket, STC in anonse ki napa okenn son staf ki pou ganny afekte, e ki zot pou plito ganny abzorbe par lezot landrwa dan sa lakonpannyen.
