Iimbuluma yomusita Moussongela yanyanwa

Aantu omathele oya ningi ehololomadhilaadhilo yeli ompinge negandjo lyomboloha komusita Pedro Marcelino Moussongela pethimbo kwa pulakenwa eningo lyeindilo lyomboloha ye.


Mboka ya kala ompinge nemangululo lye pamboloha, oya mwe yomoonakuninga iihakanwa ye pamwe naakwanezimo yawo.

Moussongela, ngoka eli omutotipo gwongeleka yedhina
Evangelical Mennonite Brethren Church oshowo oskola yoMennonite Brethren Community School Namibia, otaku hokololwa kutya okwa longitha edhina lyongeleka noskola ndjoka mokulanditha po aaNamibia mboka yeli mompumbwe kiilongo yaEuropa nokuya ningitha aapika yopamilalo.
Okwa kala mondjeedhililo konima nkene a tulwa miipandeko momasiku 23 gaJuni nuumvo.


Ota pangulilwa iipotha yelanditho lyaantu, ekwatonkonga, omadhengo oshowo eningilo lyaantu omatilitho.


Gumwe gwomiihakanwa ye oFidel Nakashololo, ngoka a lesha muule omukandanyenyeto gwe moka a popi kombinga yiilonga ya nyata yomutamanekwa.


Nakashololo okwa popi mo-2002 oya falwa koSouth Afrika pamwe naamwayina ye yane, omanga yina ngoka a li a hokanwa kuMoussongela pethimbo ndyoka a falwa koCanada.


Okwa popi kutya okwe shi pondola okugalukila kegumbo mo-2006 mekwathelo lyaakwanezimo ye yalwe.


Nakashololo okwa pataneke emangululo lyomutamanekwa ta ti shoka a ningi kasha li mondjila na epogolo lyuuthemba womuntu na okwa popi kutya ngele okwa mangululwa nena otaka tsikila niilonga ye mbyoka ya nyata.
Omanga ina tulwa miipandeko muJuni, Moussongela okwa holoka mompangulilo yaMangestrata gwaKatutura muMei omolwa iipotha ya faathana.


Pethimbo a holoka mompangulilo muMei, okwa uvika kutya Moussongela okwa landitha po aanona ye yatano koEngland na okwa tumu omuntu gwontumba a fale aanona mbyoka koLondon yeli kohi yoomula 12.


Gumwe gwomadhengingonyo yaNamibia, Paulus ‘The Rock’ Ambunda okuli gumwe gwomwaamboka ya ningi ehololomadhilaadhilo pompangulilo yaNdangwa mEtitatu, ta popi kutya omumwayinagona gumwe okwa landithwa po komutamanekwa omanga a li e na oomvula omugoyi nofamili inayi uva we okuza kuye sigo osho a ningi oonkambadhala dhokumukonga nuumvo.


“Ofamili yandje oya hala okanona ka galuke ihe katu shi kutya okuli lela peni. Sho nda kambadhala okupopya naye omwedhi gwa piti, okwa pitikwa owala a popye uule woominute 15. Memegona gwandje okwa limbililwa noonkondo nofamili ayihe oyi li monkalo odhigu. Otatu pataneke emangululo lye molwaashoka otu na uutile kutya ngele a zimo modholongo nena otashi vulika katu ka mone we okanona hoka,” Ambunda ta ti.
MuJuni natango okwa patululwa iipotha yeyonagulo lyuuthemba woomuntu mekwathelo lyoNamRights.
NamRights oya popi kutya nakutulamo oshipotha omunaskola nale muyimwe yomooskola dhaMoussongela.


Okwa li a falwa koTurkey taku tiwa otayi koskola ihe okwe keshi mona owala kutya okwa falwako nongeshefa yopamilalo.


Nakunyenyeta okwa popi kutya okwa kala ta ningilwa omiyonena dhopamilalo moNamibia na okwa ningi etegelelo ndyoka lya kuthwa mo.








Omupanguli Peter Nangula okwa undulile oshipotha shepulakeno lyomboloha yomutamanekwa komasiku ga3 ga Kotomba, omanga omukalelipo gwepangelo moshipotha Dollen Gowases okwa yakula omukandanyenyeto okuza kaaningimahololomadhilaadhilo na okwa popi kutya omakonaakono moshipotha shaMoussongela otaga tsikile.


ILENI NANDJATO