Dimoun avek dezabilite i demann plis konprenezon |11 August 2016
Plizyer dimoun avek dezabilite in fer temwannyaz zot bann abilite spesyal e serten in osi profite pour demann plis konprenezon avek lotorite konsernen dan sosyete ek kominote kot zot viv atraver bann fasilite ek servis ki a zot dispozisyon.
Zot ti fer sa pandan en seremoni ki Konsey Nasyonal pour Lazenes (SNYC) ti organize yer bomaten pour lans valer pour sa mwan ki ‘KONPRENEZON’.
Bann aktivite dan sant Konsey Nasyonal pour Lazenes Rivière Anglaise pour lans sa enn valer ti’n organize an etrwat kolaborasyon avek diferan mouvman ki travay pour byennet ek lentegrasyon bann dimoun avek dezabilite e sa i Sant Reabilitasyon North East Point, lasosiasyon Love and Care e osi mouvman Foi et Lumière.
Sekreter prensipal pour lazenes Alain Volcère, plizyer paran e osi zanfan ek zenn avek dezabilite, bann travayer lazenes parmi lezot envite ti asiste sa seremoni ki ti tre emouvan sirtou letan sa bann zenn ti atraver zot poenm ek sanson, mim, ladans ek lezot prezantasyon demontre ki zot annan bokou abilite menm si a plizyer repriz sosyete ek kominote i mank sa konprenezon anver zot.
Thomas Knowles, en santer tre koni ki pa vwar kler, ti fer resorti ki menm si bokou in ganny fer pour ed dimoun avek dezabilite i ankor annan bokou modifikasyon pour fer atraver bann diferan fasilite pour fasilit akse pour bann dimoun avek dezabilite.
I ti azoute ki bann dimoun ki ofer servis e osi manm piblik i merit montre plis konprenezon anver bann dimoun parey zot.
“Ler en dimoun avek en dezabilite i vin labank e i ganny priyorite fodre pa piblik i ankoler akoz i pe pas devan zot me plito zot devret montre plis konprenezon,” Msye Knowles ti dir.
Cecile Lablache, en lot santez ki osi aveg, ti dir ki i annan ankor bokou ledikasyon pour fer avek nou dimoun.
“Se selman atraver ledikasyon, bokou ledikasyon dan lekol lo bann diferan form dezabilite ki zanfan an grandisan ava konpran kwa ki en dimoun avek dezabilite i pas atraver e sa i a ede annan plis konprenezon,” i ti dir.
Lo son kote Levek French Chang-Him ti fer resorti dan son refleksyon lo sa valer ki konprenezon i demann nou tou pour esey antre dan lakok en dimoun avek dezabilite pour esey santi bann keksoz parey li e vwar lemonn parey zot pe vwar.
Alvin Laurence, sef egzekitiv SNYC, i dir ki toulezan depi ki progranm valer in lanse zot in esey fer bann aktivite avek bann dimoun dezabilite me sa lannen zot in deside anmenn ansanm diferan group ek mouvman ki okip sa bann dimoun akoz sa enn valer i tous zot bokou.
“Nou ti anvi remersye zot tou enkli osi tou sa bann paran pour zot dedikasyon anver tou sa bann zanfan e osi adilt avek dezabilite. Byen souvan i nou, bann ki byen, ki montre ki nou annan en dezabilite letan nou mank konprenezon lo sor sa bann dimoun,” Msye Laurence ti eksplike.
I dir lefe ki sa aktivite yer in deroul kot sant Konsey Nasyonal Lazenes i pour fer rapel sa bann dimoun ki zot toultan byenveni dan sa landrwa ki annan akse ek fasilite pour akey zot osi.
Apard sanson, temwannyaz, poenm, teat par diferan dimoun avek dezabilite, ti osi annan en prezantasyon lo sa valer par en group travayer lazenes. Sa group ti osi atraver zot prop linisyativ fer prezantasyon fàn avek 2 fanmir pli vilnerab.
