Pagkamatay ni Jaime Fabregas sa ‘Ang Probinsyano’ pinagluksa ng madlang pipol

NAGLUKSA ang mga manonood sa pagkamatay ni Lolo Delfin sa episode ng FPJ’s Ang Probinsyano noong Lunes. Si Delfin ay ginagampanan ng veteran actor na si Jaime Fabregas na lolo at boss ni Cardo (Coco Martin) sa PNP.

Selebrasyon ng kaarawan ni Lolo Delfin ang mga eksena sa nasabing episode at naikuwento nga nito kina Cardo na isang taon na lang ay retirado na siya at masaya siyang aalis ng serbisyo na malinis ang pangalan. At dapat daw itong manahin ng under niyang pulis kasama na si Arjo Atayde bilang si Joaquin.

Habang nagkakasayahan ay binaril siya ni Cesar Montano na may matinding galit sa lolo ni Cardo dahil sa pagkamatay ng asawang opisyal din sa isang engkuwentro. Umalis ito sa serbisyo at naging hired killer. Dahil sa pagkamatay ni Lolo Delfin hinanting ni Coco si Cesar hanggang sa magpang-abot nga sila sa isang restaurant. Tiyak na umaatikabong aksiyon ang magaganap sa mga susunod na episode ng serye.

Mahaba pa ang tatakbuhin ng FPJ’s Ang Probinsyano kaya nakakapagtaka kung bakit kailangan nang patayin si Lolo Delfin. At sino kaya ang papalit sa puwesto niya sa PNP? May malaking sorpresa tiyak ang Dreamscape kung sino ang susunod sa pwesto ng opisyal ng PNP.