Eski rezo sosyal i annan en lenpak negativ lo enteraksyon antre imen? |20 May 2016

Dan en deba dan kad lasemenn teknolozi ek lenformasyon bann zenn ti diskite si rezo sosyal i annan en lenpak negativ lo enteraksyon antre imen.

Sa aktivite ti ganny organize par departman pour lenformasyon, kominikasyon ek teknolozi (DICT) an kolaborasyon avek Liniversite Sesel (UniSey), Konsey Nasyonal pour Lazenes (SNYC) an patenarya avek SBC.

Ti annan de group, enn ki ti an faver sa mosyon ki rezo sosyal i annan en lenpak negativ lo enteraksyon imen e lot group ti kont.

Gannyan sa deba sete group ki ti kont sa mosyon e son bann manm ti konpri Neil Way-Hive, Jellissa Julie, Danio Vidot, Katrina Souffe ek Nelson Etienne.

Dan group ki ti an faver ti annan Aisha Rachel, Marius Esparon, Raina Nicette, Marcus Hoareau ek Jimmy Port Louis.

Parmi lodyans ki ti prezan ti sekreter prensipal pour ICT Benjamin Choppy, depite sef egzekitiv SNYC Ghislain Belmont, Vis-Sanselye UniSey Profeser Dennis Hardy, rezistrar UniSey Michel Denousse, reprezantan bann diferan lorganizasyon, bann zenn ek etidyan.

Lo konmansman sa deba lodyans ti pran en vot kot 62% ti an faver sa mosyon e 38% ti kont, me apre bann deliberasyon, 71% lodyans ti kont sa mosyon e selman 29% ki ti an faver.

Aisha Rachel ti dir ki rezo sosyal i prezant en platform en lemonn vertyel kot lenformasyon, lide, portre ek video i kapab ganny esanze.

PS Choppy ti dir ki sa deba ti vreman enteresan sirtou rezilta.

«Enteraksyon imen i nou konman imen ki bezwen fer sa desizyon byen ou mal, lo nenport kwa nou baz etik e moral pour servi teknolozi dan sa fason. I pa neseserman ki teknolozi ki fer en keksoz arive negativman ouswa pozitivman. I vreman ki mannyer dimoun i servi sa teknolozi pour sa rezilta ki i gannyen,» i ti dir.

I ti osi fer resorti son pwennvi konman en paran: «Rezo sosyal i annan en laspe pozitiv lo kote kominikasyon. Selman konman en paran mon tre konsyan ki ou bezwen toultan pe monitor kwa ki pe pase e ou bezwen osi annan serten lareg dan lakour. Ou bezwen annan serten letan ki ou log off ; parey mwan personnelman lamazorite mon bann travay mon servi teknolozi e ler mon dan lakour mon sey servi li mwens posib.»

Jellissa Julie ti dir ki son group in vin avek largiman ki rezo sosyal i en zouti e son lenpak pou depan lo lafason ki i pe ganny servi. 

«Si i pe ganny servi kan i devret pe ganny servi e dimoun i sipoze annan disiplin e pran zot responsabilite kan ki i pe ganny servi, ki mannyer i pe ganny servi e sa i pa zis rezo sosyal akoz fas a fas osi ou konnen ki i annan serten keksoz ki ou pa devret dir dimoun nenport ki fason ki ou panse,» i ti dir.

Marcus Esparon ti dir ki pwennvi son group i ki i vre rezo soyal i annan lenpak negativ lo enteraksyon imen me pa totalman.

«I plito lafason ki dimoun i enterpret sa ki zot war lo rezo sosyal ki fer sa lenpak negativ,» i ti dir.