Lazournen mondyal lektir kot Lenstiti Kreol |29 April 2016

Bann zanfan lekol segonder ki eneterese dan literatir kreol ti pran par dan en latelye literatir alokazyon lazournen Mondyal pour Liv e Drwa Doter.

Sa aktivie ki ti deroul yer bomaten kot Lenstiti Kreol, Au Cap, ti enkli partisipasyon bann ekriven Seselwa ase koni nasyonalman e enternasyonalman pour zot travay dan bann diferan zanr literer.  Parmi: Lise Morel, Ruben Lespoir ek Edwin Henriette.

Sef Ekzekitif Lenstiti Kreol Penda Choppy ti fer resorti ki zot in organiz sa akitivte pour bann zanfan segonder pour zot kapab dan lefitir annan sa lanvi pour lir nou bann literatir kreol.

«Sa latelye in fer pour familyariz bann zenn avek nou literatir kreol, akoz letan literatir kreol ti fek konmanse ti annan plis lentere ladan parmi bann zenn. Konmela avek bann nouvo teknolozi, bann zenn i lir plis lo Facebook, e zottir bann liv lo internet. Nou kot Lenstiti Kreol nou pe eseye pour gete si nou kapab fer bann liv elektronik ki zanfan i osi kapab tire lo internet. Bann zenn pa pe lir ase literatir kreol,» i ti dir.

Aktivite ti deroul dan laform bann mini latelye kot bann zanfan ti groupe dapre zot preferans literer e bann ekriven  ti la koman fasilitater dan sak group. Zot ti partaz zot leksperyans avek bann zelev e esplik zot bann faz ki zot pas atraver letan ki zot pe ekri en louvraz.

Ti osi annan en sesyon lekritir lib kot bann zenn ti servi sa ki zot in aprann pour prodwir bann teks dan bann diferan zanr parey lapoezi, resi foklorik, resi kontanporen, resi syantifik, roman ek tradiksyon.

Monique Choppy, Taisha Morgan ek Arianna Charles ki sorti dan S5 lekot La Rivière Anglaise, ti fer resorti ki i enportan pour protez nou literatir kreol.

«Literatir kreol i enportan pour ganny proteze. Konmela, vi ki i annan bann liv elektronik, nou bann zenn nou pli kontan lir san bann kalite liv. Vi ki Lenstiti Kreol pe promot bann liv kreol, i en bon keksoz akoz i pou ed nou bann zenn rekonnekte avek lepase. Apre sa latelye nou pou annan plis bagaz pour nou kapab konpran e lir bann liv kreol,» zot ti dir.