OAKLAND, California — Hindi nakapaglaro ang starting point guard ng Golden State Warriors na si Stephen Curry sa Game 2 ng first round NBA Playoffs kontra Houston Rockets kahapon.
Gayunman, tinalo pa rin ng top seed Warriors ang No. 8 Rockets, 115-106, para manguna ng 2-0 sa kanilang best-of-seven series.
Nanguna para sa Golden State si Klay Thompson na may 34 puntos at tumira ng 15-of-16 mula sa free throw line.
Nagdagdag naman ng 18 puntos si Andre Iguodala mula sa bench ng Warriors.
Nagpahinga kahapon si Curry matapos na magtamo siya ng ankle injury sa Game One kung saan nanalo rin ang Warriors, 104-78.
“We’ve relied on our depth all year, not just when Steph’s out,” sabi ni Draymond Green na nag-ambag ng 12 puntos, 14 rebounds at walong assists. “I think we’re the deepest team in the NBA.”
Tinapos ng Warriors ang regular season na may NBA record 73 wins.
Si James Harden ay may 28 puntos at 11 assists para sa Rockets
Sa isa pang Western Conference playoff series kahapon ay tinisod ng No. 6 Dallas Mavericks ang No. 3 Oklahoma City Thunder, 85-84, para itabla ang serye sa 1-1.
May pagkakataon ang Thunder na makuha ang panalo nang umiskor ng putback basket ang sentrong si Steven Adams sa pagtunog ng buzzer ngunit matapos ang masinsinang review sa Replay Center ay napag-alamang hindi ito umabot sa takdang oras.
Si Raymond Felton ay may 21 puntos at 11 rebounds para sa Mavs.
Sa Eastern Conference, binigo ng Toronto Raptors ang bisitang Indiana Pacers, 98-87, para pantayin ang serye sa 1-all.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.