En 50enn koup, vev ek zenn i partisip dan sesyon ledikasyon ek lavi fanmir |30 January 2016

En group 145 dimoun -- ladan en 50enn koup, bann vev e osi plizyer zenn -- ti resaman  pran par dan en sesyon ledikasyon ek lavi fanmir.

Sa sesyon en zournen , premye pour sa lannen e organize par Lasosyasyon Pour Promosyon Fanmir Solid (APSHF) an kolaborasyon avek parwas St Michel Archange Anse Aux Pins, i anliny avek deklarasyon Lepap François pour 2016 ki   Lannen Mizerikord – savedir plis lanmour, pardon, pitye, konprenezon ek dezir  dan leker pour ed lezot.   

Sa rankont, ki ti deroul dan Legliz St Michel Anse Aux Pins menm Sanmdi le 23 Zanvye,  ti dirize par en koup, Pauline Mayi Diofa ek Paul Mbula Zola, konsiltan dan Education à la vie sorti Repiblik Kongo. Sa koup i isi depi lannen pase e i pe travay avek APSHF lo sa progranm Education à la vie.

“Sa progranm i adres bokou bann valer imen tel ki moral, psikolozik ek spirityel,” sef egzekitif APSHF, Madanm Rosy Denis, i dir.

Madanm Denis i dir pour sa premye sesyon ti annan antou en 50enn koup, en bon nonm vev e osi zenn e sa ti fer ki ti annan en group 145 dimoun sa zour ki i dir i tre ankourazan.

Parmi bann size ki ti aborde sa zour ti lentimite dan koup, dan relasyon e osi lentimite endividyel e tou bann santiman ki asosye avek ti ganny diskite.

Madanm Denis ti fer resorti ki Per Lonnie Adrienne, kire sa parwas ki osi omonye APSHF, ti profite pour koz avek bann koup lo sakreman maryaz e i ti met lanfaz lo lenportans en tel sakreman pour en linyon ek en fanmir solid.

“Sa lazournen ti enn ki bann koup ti dekri konman tre anrisisan avek boukou diskisyon, lesanz ek partaz an group e i ti en moman kot bann partisipan ti koz ouvertman lo zot santiman san kanmi zot partener, en keksoz ki bokou, sirtou bann zonm, zot dir souvannfwa zot vwar li difisil pour koz lo la,” Madanm Denis ti fer resorti.

I ti azoute ki sa progranm Education à la vie pou kontinyen e APSHF i anvi travay avek tou dimoun dan pei san get apartenans relizyez, laz oubyen ran dan sosyete me tou koup marye ou non, zenn, vev e nenport endividi ki santi zot bezwen bann tel sipor pour ed zot pli byen viv zot lavi, zot relasyon avek lezot.

“Lide deryer e bi en tel progranm se pour reanmenn bann bon valer dan relasyon bann koup e osi dan bann fanmir akoz sa ki sa group in partaze e gannyen atraver sa sesyon zot pou al met an pratik se zot e dan zot lavi ek relasyon,” Madanm Denis in dir.

Madanm Denis i dir ki plis sesyon parey pou organize pandan lannen e byento pou annan en sesyon zis pour bann zonm, enn zis pour bann madanm e osi bann retret pour bann koup, tousala avek bi esey redres bann fanmir ki deplizanpli pe ganny tape e menase avek tou kalite fenomenn sosyete.

Madanm Denis i dir ki lasosyasyon pou kontinyen avek bann diferan sesyon pour  gard ansanm sa group dimoun ki’n asiste sa premye sesyon.

Antretan APSHF i kontinyen son bann demars pour anmenn son sipor pour kontinyen reanmenn bann bon valer dan sosyete e sa semenn menm Madanm Denis i dir zot in annan en rankont avek bann direktris lekol pour diskit en progranm pour bann lekol.

“Avek  progranm valer ki pe met lanfaz lo bon valer dan lafanmir sa lannen mon kwar i annan bokou keksoz ki nou kapab travay ansanm pour redrese e kantite ki nou kapab fer i pou en lavantaz pour nou tou osi byen ki pour nou pei,” Madanm Denis i dir.

In profite pour lans lapel avek tou dimoun ki santi ki zot bezwen kek led oubyen sipor dan zot relasyon, dan zot fanmir pour pa ezite pour vin devan. Zot kapab swa pas kot lofis APSHF dan batiman La Salle d’Oeuvres oubyen telefonn 4225300 nenport ler pandan ler travay.

M-A.L