Fidel i aprann plis lo lavi Josephine Cafrine |21 January 2016

En gran nonm fidel ti asiste en konferans Dimans pour konmemor 109enm lanniverser lanmor Josephine Cafrine, sa zenn fiy ki ti mor avek lalep le 14 Zanvye 1907.

Sa konferans, ki ti deroul dan Katedral Imakile Konsepsyon, ti swiv par en legzibisyon lo lavi Josephine Cafrine.

Letan i ti ofisyelman lans sa levennman, Levek Katolik Denis Wiehe ti dir : «Nou beni e remersye Senyer pour lavi Josephine e pour legzanp ekstraordiner son lafwa e son byenfezans fas a bann leprez terib, sa temwayaz i eklate pour ensi dir, lo sak paz sa liv i rakont son lavi. I envit nou pour konpar nou bann prop leprev menm si i pa osi dire parey sa ki li, Josephine, in viv.» 

Osi prezan pandan sa levennman ti Minis pour Tourizm ek Kiltir Alain St Ange, manm fanmiy Josephine Cafrine, bann pret, parmi lezot krwayan.

Pandan konferans kat entervenan ti fer prezantasyon lo lavi sa model lafwa avek sa maladi ki i ti fer fas avek. Zot ti Dokter Maxime Ferrari, Per Roger De Commarmond, Dokter Marie-Reine Hoareau ek Norlis Rose-Hoareau.

Sa bann aktivite in ganny organize par komite dyosezen Josephine Cafrine formen an 2010 avek bi promouvwar e fer konnen lekel li Josephine Cafrine istorikman, spirityelman e sosyolozikman.

Dokter Ferrari ti eksplik enpe lo lalep Sesel, Per De Commarmond ti santre lo lalep dan labib, Dokter Hoareau ti koz lo lasosyete dan lepok Josephine e Msye Rose-Hoareau ti eksplik en pti pe plis lavi Josephine par bann diferan letap.

Bann prezantasyon ti swiv par lansman versyon angle ek kreol otobiografi sa fiy ki  ti atrap lalep a laz 12-an.

Sete Per Philibert ki ti dan parwas Anse Royale sa letan ki ti termin son zistwar vi ki Josephine ti ekrir ziska i ti nepli kapab atrap son kreyon akoz i ti perdi son ledwa avek sa maladi.

Apre lanmor Per Philibert, Per Vital ti dekouver sa pti kaye e an 1923 ti annan en premye piblikasyon otobiografi Josephine an Belzik.

Ilistrasyon Josephine ti ganny fer par Manmzel Belinda Valmont ek Madanm Alexandra Azais.

Komite dyosezen Josephine Cafrine pe lans en lapel avek piblik ki kapab kontribye ankor lenformasyon lo sa zenn fiy pour kontakte en manm komite.

Ou kapab osi zwenn group ‘Bann Zanmi Josephine Cafrine’ ki pou lanse byento.

Bann manm sa group i ava travay pre avek komite lo bann proze pour promouvwar Josephine par kolekte lenformasyon ek fon pour finans sa bann proze.

Msye Rose-Hoareau, ki tyermenn komite, i santi ki malgre bokou piblisite in ganny fer lo sa zenn fiy, i annan ankor dimoun ki pa konn li.

«Nou anvi anmas otan lenformasyon posib ki answit petet plitar fer en prosedir beatifikasyon,» i ti dir.

Pour prosedir beatifikasyon fodre i pas atraver ‘Bienheureux’ kot i bezwen trwa mirak ki lasyans pa kapab dekri e apre sa i bezwen ankor de mirak.

Pour le moman Msye Rose-Hoareau in dir ki napa personn ki’n vin devan avek tel mirak.

«Sa i rezon ki nou anvi otan temwannyaz akoz i annan de kalite mirak, enn ki spirityel e lot fizik oubyen medikal parey ler en dimoun ki ti ganny kanser ti priy Jean Paul II e in ganny gerizon,» i ti dir.

Madanm Noemie Lespoir, ki ti byen apresye sa legzibisyon, ti dir ki sa linisyativ i en gran pa e i tre enportan ki pe arive pour legliz katolik.

«Nou osi isi nou ava annan en bon legzanp lokalman pour bann zenn avek bann lezot krwayan akoz Josephine i en dimoun enportan spirityelman ki nou kapab swiv e pran legzanp lo li,» i ti dir.