En lanmes pour konmemor lazournen servis piblik |24 June 2015

Bann krwayan ti rasanble yer apremidi kot Katedral Immaculée Conception pour asiste en lanmes alokazyon Lazournen Servis Piblik.
Lanmes ti selebre par kire laparwas, Per David Alcindor.

Minis Dezinyen  Vincent Meriton, ki osi Minis pour Zafer Sosyal, Devlopman Kominoter ek Spor ; Minis pour Lanplwa ek Devlopman Resours Imen Idith Alexander ; Minis pour Lenvestisman, Devlopman Lantreprenarya  ek Inovasyon Biznes Michael Benstrong, e Minis pour Lasante Mitcy Larue ti parmi bann ki ti asiste sa lanmes.

Dan son lomeli Per Alcindor ti fer resorti ki tou travay in enportan e nenport ki louvraz ou fer i pour dibyen nou nasyon, e ki Bondye i rekonnet e apresye bann ki rann gras pour sa benediksyon ki’n anvoy nou sinon nou pa pou kapab fer gran keksoz .

«Nou pa zis bann serviter Bondye,» i ti dir, «nou serviter dimoun, serviter piblik e serviter lepep. Sak zour ki nou pe desann pour al travay se Bondye ki donn nou kouraz ki fer nou vin en serviter,» Per Alcindor ti dir.

I ti osi dir ki Zezi pa ti vin lo later pour ganny servi, me pour donn nou son servis. I fer rapel ki ler Zezi ti pe lav lipye son bann disip i ti dir avek zot sa ki i fer pour zot fodre zot fer parey pour kanmarad.

I ti azoute «sa ki zot oule lezot i fer pour zot fodre zot fer pour zot menm».
I ti fer resorti ki en vre lider i kapab mark lavi lezot, i kapab tir lezot dan difikilte e ki i bezwen osi annan lotorite me fodre ki zot egzers li konman en servis.
Pour fini Per Alcindor ti felisit bann dimoun ki travay dan servis piblik pour zot kantite bon travay e ki zot bann febles ava ganny aranze.

Sesel pe selebre Lazournen Servis Piblik depi son lansman an 2003 par Nasyon-z-Ini (UN) e in ganny marke pour selebre valer servis piblik dan kominote. Nou met lanfaz lo kontribisyon ki servis piblik in fer pour ed devlopman pei, nou apresye travay ki bann servant piblik i fer e osi pran sa loportinite pour ankouraz bann zenn pour pourswiv en karyer dan servis piblik.