‘Klinik Berhenti Merokok’ mantu orang ti bisi ati deka ngetu ngisap

0

KUCHING: Mensia mayuh ti bisi ati deka ngetu nginsap tau minta bantu ngagai ‘Klinik Berhenti Merokok’ ti disedia ba tetiap buah klinik dalam kandang mengeri.

Pemesai Pekara Pengerai Bagi Kuching Dr Azmi Ahmad madah, servis nya bisi disedia di Klinik Pengerai Kota Sentosa, Batu Kawa, Tanah Putih, Jalai Masjid, Petra Jaya enggau Rajah Charles Brooke Memorial Hospital (RCBM) Jalai Puncak Borneo.

“Kitai ngemeratka orang ti keran deka ngetu nginsap. Barang sapa ti deka ngetu kitai nyendia program ti ulih mantu iya ngelengka insap.

“Kitai mega nyendiaka ubat ngambika ulih mantu sida ngetu ke alai program tu begunaka timpuh ke panjai lalu manggai ngagai enam bulan.

“Pengudah nya baru kitai ulih nentu sekalika nuan udah amat ngetu tauka enda. Kelimpah ari nya, kitai mega deka mantau pengudah dua taun sida ngetu nginsap,” ku iya.

Iya mansutka jaku tu lebuh dikerandau pengarang berita pengudah ngelancharka ‘Hari Tanpa Tembakau Sedunia 2015 & Kem I Want Sihat’ renggat Pelilih Kuching di Klinik Pengerai Kota Sentosa ditu, kemari.

Azmi mega madah, raban penyereta program ngetu nginsap nya mmega deka diberi kaunseling.

Program ngetu nginsap tu dipungkal ba taun 2009 ke alai taun tu sida nagit ulih ngerijista enda kurang ari 25 iku orang dalam tiga bulan keterubah.

Ngenang kaul ke sama, seiku penyereta program ke mujur ngetu nginsap, Lawing anak Bawi, 51, madahka iya teperansang deka ngetu ketegal mendingka jaku ajar ari lutur.

Iya ti peranak asal Sebuyau udah berengkah nginsap rambau ba Form Dua menya lalu ulih ngabiska sebungkus insap dalam sehari.

“Ba bulan Januari tu tadi aku ke klinik ngambi ubat darah tinggi. Lutur bisi nanya sekalika aku deka ngetu nginsap ketegal ulah nya tau ngeruga pengerai.

“Aku setuju lalu dipasuk nyereta program ngetu nginsap di Klinik Kota Sentosa ditu. Berengkah ari nya aku udah kurang nginsap nyentuk aku ngetu terus.

“Diatu pengerai aku nyau majak manah,” ku iya ti bisi dua iku anak.

Bela bisi datai Chairman Opis Kunsil Kandang Padawan (MPP) Lo Khere Chiang enggau Ketuai Unit Program Ngetu Nginsap Dr Sally Suriani Ahib.