KUCHING: Dalam kandang lima ngagai sepuluh taun ari diatu, perintah merambu deka ngena sistem Monorail Transportation (MRT) dikena napi penyekut di bandaraya Kuching.
Menteri Dagang Temuai Datuk Amar Abang Johari Tun Openg madah, sistem MRT nya dipelaba diperambu dalam RMK ke-11. Kuching maya nya disadang nyadi sebuah ‘Competitive City’ nyengkaum tiga buah bandaraya bukai baka Kuala Lumpur (KL), Johor enggau Kota Kinabalu.
“Reti nya bisi tiga komponen dalam pemansang nengeri, iya nya pengawa ngaga rumah ke bekualiti, pengelikun rayat ke nguan bandaraya sereta konsep rumah bepenyiru; kedua, sistem pengangkut ti ngemuntangka pejalai mensia mayuh lalu ketiga,pemansang dalam bandaraya ti ngembuan penyikap perengkaguna mensia mayuh baka supermarket sereta penyikap endur belepa sereta rampa menua ke bekualiti,” ku Abang Johari.
Iya madah munyi tu lebuh dirandau pengudah nutup atur Kos Induksi Orang Dagang Satok, Tourism Youth Uptown di Dewan Kompleks Nembiak, Lumba enggau Main ba Jalai Tun Ahmad Zaidi Adruce ditu, Hari Dua tu tadi.
Abang Johari ti mega Menteri Pengawa Berumah madah, perengka pengangkut mensia mayuh ti dikedekaka perintah menua iya nya, sebengkah sistem perengka pengangkut ke manah baka MRT.
“Aku deka nganjung perambu tu ngagai EPU (Unit Perambu Ekonomi)…..Kitai patut bisi perambu ngaga sistem pengangkut ke manah di mengeri tu.
“Mengeri enda tau enda dikemansang ngambika enda sekut, manah kitai tumu merambu sistem ke manah baka MRT, lalu enti patut dikemansang, nya patut setipak enggau pemayuh mensia ke nguan kandang mengeri.
“Perambu sistem tu patut mungkur Pelilih Serian,Kota Samarahan enggau bandaraya Kuching.
Kelimpah ari MRT, servis bas ke manah sereta jampat mega patut bisi dikena nyeliahka penyekut.
“Enda ngawa enti MRT nya tau dikenudi, tang perambu ke patut digaga tumu iya servis bas ke manah sereta jampat sebedau sesebengkah kandang mengeri sekut. Enti udah nyadi sekut, tusah kitai ngaga perambu,” ku iya.
Naka ke diatu, statistik mandangka penyampau mensia ti diau di kandang mengeri Kuching enggau Samarahan bisi 800,000 iku tang enti manggai 2020, dipelabaka manggai ba sejuta iku bepun ari penyampau palan pelajar tinggi sereta dagang temuai enggau penyampau nembiak ke majak nambah.
“Maya nya mega, mensia ke nguan mengeri berumur entara 40 ngagai 45 taun dipelaba urung 55 peratus. Berindik ari demografi pemayuh mensia, orang deka agi bepindah ngagai nengeri taja pan perintah diatu keran deka ngemansangka menua pesisir.
Taja pia, Abang Johari madah sebedau ngaga MRT, sistem ti manah sereta jampat enda tau enda digaga dulu.
“Nya alai, kitai patut beratika pekara nya sekalika patut tauka enda.Baka ke diatu, bas nadai tentu ditepan laban nadai sistem, nyengkaum endur ngambi orang tauka nyangkaika orang pan nadai tentu maya jam. Orang pan enggai nepan bas laban atur ti enda konsisten. Nya kebuah kitai ngaga sistem ti manah sereta jampat. Kitai meda gaya sistem bas ti manah sereta jampat tu dulu, udah nya baru kitai berundingka MRT,” ku iya.
Ku iya baru, ngaga sistem MRT enda ulih diperumbanka. Taja pan nya perengka pengangkut ke murah tang begunaka ungkus ti besai, ku iya.