Dikarang Chris Bishop//
KOTA SAMARAHAN: Opis Imigresyen Malaysia (JIM) pampang Sarawak deka ngadu kerejasama rat enggau ejensi penerit adat bukai dalam atur nentuka garis entara menua diintu enggau manah.
Direktor JIM Sarawak Datu Robert Lian madah, raban JIM Sarawak enda tau sesekali ilap sentang pengelikun ba garis entara menua, lalu anang sesekali mantul napi semua pemar ke datai.
“Kitai enda ulih sesekali ilap maya bejalaika tanggungpengawa ketegal pengelikun menua tu dilempaika ba kitai magang.
“JIM Sarawak deka ngangkatka tikas pengelikun ba garis entara menua berengkah ari Sematan nyentuk ke Lawas lalu semua nya deka diadu nengah kerejasama rat begulai enggau ejensi bukai.
“Sepemanjai 1600 Km garis entara menua ti diintu kitai lalu aku pechaya raban JIM Sarawak deka napi mayuh macham pemar, semina seiti aja pesan aku ..anang sesekali mantul maya bejalaika tanggungpengawa,’ku Robert.
Iya mansutka penerang tu ba jaku pengelalu rambau pengawa nyuaka ‘Anugerah Perkhidmatan Cemerlang’ (APC) Opis Imigresyen Zon Sarawak ditu, kemari.
Robert ti deka pinchin dalam timpuh sebulan tu mega madah, raban imigresyen ti nyaga pintu penama patut ngangkatka imej ejensi enggau menua tu ba mata temuai.
Ku iya, dalam pengeran kitai matak mayuh agi temuai datai, kitai patut nentuka pengelikun sida dijaga, lalu pia mega nentuka sida sigi temuai ke sah.
“Tuju temuai tama ke menua tu patut disilik, kitai sigi ngelaluka sida datai tang enti tama enggau tuju ke jai, pekara tu patut diputar,’ku iya.
Nambahka nya iya mega madahka JIM Sarawak deka majak bejalai operasyen ngiga orang menua luar ke tama ngagai menua tu enggau enda beradat.