BELURU: Menteri Muda Rengka Rama (Bekal Ai) Datuk Slyvester Entri Muran udah mujur nyuaka geran projek mit pemansang menua pesisir (MRP di Balai Mensia Mayuh Beluru, Bakong kena Hari Empat tu tadi.
Sama bisi datai ba pengawa tu Kaban Parlimen (MP) Baram, Anyie Ngau.
Maya bejaku ba program nya, Ayie madahka Entri seiku ketuai ke chukup manah dalam bejalaika pengawa lebuh meri servis ngagai raban rayat.
“Baka pengawa ke diatur sehari tu, endang kala disemayaka iya maya bekimpin suba,” ku iya.
Kenu ku Ayie, Entri seruran ngelalau iya ngambika anang bechiping lebuh nyadung MRP ngagai rayat di Marudi.
Anyi madahka sitak Marudi diatu dikemansang enggau mayuh bengkah projek infrstruktur, berebak enggau nya iya ngelalau mensia mayuh terus nyukung pengari rayat ke udah dipilih perintah Barisan Nasional (BN).
“Entara pemansang ke digaga ditu iya nya bekal kuasa karan, ai beresi enggau jalai alun. Semua tu mujur digaga nengah pengari rayat ke udah dipilih kita,” ku iya.
Nangkan nya, Enti muji Ayie laban ke seruran bekerejasama enggau iya dalam ngemansangka sitak Marudi.
“Penegap kerejasama baka tu ulih nyungkak mayuh agi pemansang ke udah diperambu ungkup menua Marudi ke lalu meri penguntung ngagai semua rayat,” ku iya.
Entri madahka pemanah kaul entara Kaban Kunsil Nengeri (ADUN) enggau MP beguna amat ngambika semua pengawa ke dilanggur ulih muntang dikemujur.
Ba program nya, dua iku pengari rayat BN nya bela bisi nyuaka geran sepenyampau RM7,102,620 dikena bejalaika mayuh bengkah projek, ungkup 76 iku penerima.