Orang ke patut nyadi pengari rayat iya nya sida ti dipilih sereta nemu mantu tiap peranak menua
KUCHING: Pekara ti nentuka sesiku ulih nyadi pengari rayat, iya nya dipilih rayat lalu ukai ketegal landik ba mayuh macham bansa jaku.
Presiden Parti Rakyat Sarawak (PRS) Tan Sri James Jemut Masing madah, pengelandik bejaku ba sesebengkah bansa jaku enggau manah sereta dalam konteks tu (Bahasa Melayu) nyadi pengelebih ngagai sesiku pengari rayat, tang nya ukai pekara ti nentuka sesiku nya ulih nyadi ketuai ti diterima rayat.
“Seiti pekara ti nentuka sesiku ulih nyadi YB (Yang Berhormat) iya nya dipilih (maya pengawa bepilih).
“Enda ngira sekalika orang nya (chalun) landik bejaku dalam Jaku Melayu, English tauka Jaku Asal iya empu, tang pekara ke beguna amat iya nya ulih gawa enggau manah ke rayat,” ku iya.
Masing ti mega Menteri Kanan Menua sereta Menteri Pemansang Tanah madah,pengelebih nyadi kaban politik ke manah nya sabjektif.
Taja pia ku iya, ukai reti iya mantah sida ke ukai Melayu enda tau enda landik ba sesebengkah jaku, tang nya ukai pekara ti beguna amat entu deka nyadi orang politik.
Iya madah munyi tu lebuh nimbal langgur penemu kaban akademik Prof. Dr Mohd Ridhuan Tee Abdullah, ti madahka seseiku orang ke bisi ati nyadi pengari rayat ba tikas Parlimen tauka Kunsil Nengeri (DUN) enda tau enda bulih ‘kepujian’ BM dalam peresa Sijil Pelajaran Malaysia (SPM).
Kena Hari Minggu nyin tadi, Chairman Opis Pengawa Bepilih (SPR) Tan Sri Abdul Aziz Mohd Yusof madahka opis nya benung mansik langgur penemu Ridhuan Tee ari sukut pematut atur nya.
Penyanding Penemu Sos io-Budaya Per intah Malaysia,Tan Sri Dr.Rais Yatim mega diripot bisi madahka langgur penemu nya patut disukung ngambika bala ketuai di menua tu enda tau enda landik bejaku dalam BM.