Latest News Editor's Choice


News / Local

Ziyavulwa intuba zeTrade Fair ngolwesibili

by Mthokozisi Dube
26 Apr 2015 at 10:30hrs | Views
IMIGWAQO yedolobheni lakoBulawayo iyabe ingalali nyoka kusukela ngoLwesibili lapho okuvulwa khona intuba zemagumeni eZimbabwe International Trade Fair.

Umkhosi walonyaka ongowesi-56 njalo uqhutshwa ngaphansi kwendikimba ethi; Stimulating Trade; seizing opportunities to accelerate growth njalo uqhutshwa ngesikhathi ilizwe likhankasela iZim Asset.
Amazwe angu-17  abalisa iBotswana, China, India, Indonesia, Iran, Japan, Germany, Kenya, Malawi,  Mozambique,

Namibia, Pakistan, Poland, South Africa, United States of America kanye leZambia azaphatheka kumkhosi walonyaka wona oqala mhlaka 28 Mabasa kusiya kumhlaka 2 Nkwenkwezi.

UMongameli weZambia uEdgar Lungu ukhangelelwe ukuvula umkhosi walonyaka ngokusemthwethweni mhlaka 30 Mabasa lapho azabe ekhatshwe nguMongameli welizwe uKhomuredi Robert Mugabe.

Umaqhuzu weZITF uNkosikazi Nomathemba Ndlovu ubikele intatheli ukuba amalungiselo omkhosi walonyaka asesezingeni eliphezulu.

"Umkhosi weZITF uyaqala emalangeni amahlanu azayo njalo abazabukisa sebeqalisile ukufika nanko phela ama-China asekhona," kubika uNkkz Ndlovu.

UNkkz Ndlovu ubike ukuba umkhosi walonyaka uthole inani lababukisi eliphezulu elisuke ku-396 nyakenye laya ku-412 lonyaka njalo amankampani akuleli angaba yisilinganiso esiyi 55% azavela eHarare kukanti angu 37% ngawakoBulawayo.

"Kuzaqhutshwa iIncentive Travel Workshop mhlaka 28, okungumhlangano wokukhuluma ngokuqakatheka kwezokuvakatsha njalo uMnumzana Joost DeMeyer wakweleMelika uzethula umbiko," kuveza uNkkz Ndlovu.

UNkkz Ndlovu ubike njalo ukuthi mhlaka 29 Mabasa kuzakuba lilanga lamabhizimusi lapho umsekeli kaMongameli welizwe, uKhomuredi Emmerson Dambudzo Mnangagwa azethula inkulumo yakhe.

Amankampani enze kuhle azatholiswa izicoco njengenhlalayenza.

"Abazaphatheka emkhosini walonyaka bengalandela iMobile Application yeZITF ukuze bazitholele uluhlu lwenhlelo ezizenzakala," kuphetha uNkkz Ndlovu.


Source - umthunywa