Eski i annan en voler an seri ki pe ravaz popilasyon? |23 April 2015
Eski i annan en voler an seri, setadir en sel voler ki pe pas partou, kas batiman e vole e ravaz popilasyon?
Nou demann sa kestyon akoz kamera sekirite pe paret montre menm voler, abiye e arme dan menm fason, pe kas batiman e vole. Se zournal ‘Today’ ki ti premye pour koz lo sa voler avantyer e pibliy son portre degize ki kamra sekirite ti’n kapte dan en lakaz Pascal Village granmaten le 12 Avril.
En dimoun ki’n dir ki in en viktim sa endividi, in menm komante ki sa voler i byen organize dan son liniform ki enkli en bonnen, mas e en lenz gran lanmans ki kouver son lekor antye. I osi arme avek en kouto e i servi en tors nwanr pour kler li.
En lot lensidan konsernan sa voler an seri ki’n raporte avek zournal ‘Seychelles NATION’, se ki mardi ver 3er bomaten i ti kas Deepam Supermarket e vol apepre 15,000 roupi an kalen e biye e lezot lobze tel ki konpiter, telefonn mobil e tin sigaret. I ti osi pran en kopi lakle Deepam Cinema ki ti dan supermarket, me i sanble ki i pa’n konnen ki lakle ki i ti’n pran e ti abandonn li pa lwen avek batiman.
Dapre bann zimaz kamera, i paret ki sa voler in pas anba pon, dan larivyer kot Lenprimri St. Fidel pour li ganny akse avek batiman Deepam. Serten dimoun ki’n vwar sa bann zimaz in fer remarke ki sa voler i vreman profesyonnel akoz i toultan mars latet anba pour pa rekonnet li e i evit sa kamera. In pas dan zis en pti lespas ant bann bar feray ki in koupe pour kapab antre anndan. In menm kas bann konter elektrisite dan en lesey pour koup kouran pour ki kamra pa vwar li, me i pa’n reisir kas tou.
«Mon krwar ki i en «serial robber» ki pe pas partou e vole. I malere ki i annan dimoun ki travay e voler i vin vol sa ki zot rente pour gannyen,» en viktim in azoute.
Dapre lenformasyon ki nou’n kolekte, lapolis ti aret sa sispe apre sa lensidan Pascal Village le 12 Avril me ti bezwen larg li akoz ti napa ase levidans.
Si vreman i menm dimoun ki pe fer sa bann forfe, eski lapolis a kapab kwens li sa fwa si ? An tou ka, i neseser pour anmenn sa voler e lezot ki an se moman pe ravaz popilasyon devan lazistis.