Tu sebengkah ari program perintah dikena mantu rayat ke jelan penatai pemisi enggau sida ke seranta: Mawan
SARATOK: Perintah chukup manah dalam meri Bantu Rayat 1 Malaysia (BR1M) laban nadai ngira kuing penemu politik orang ke nerima.
Menteri Pemansang Rama, Tan Sri William Mawan Ikom madah, taja pia agi bisi sekeda orang ngeleseika pemanah pengawa perintah Barisan Nasional (BN) tu lalu ngumbai iya seiti ari chara politik.
“Anang ngaitka pasal pengawa bepilih besai tauka agenda politik ba pekara tu. Bantu tu diberi perintah enggau tuju ke manah laban musim tauka atur napi pengawa bepilih besai baka ke dipegendangka sekeda orang dikena ngulihka sukung rayat enggau chara bekelikuhka isu kebendar iya sida empu langsung nadai utai kala diberi ngagai rayat.
“BR1M kebendar sebengkah ari program perintah meri pengelantang ngagai rayat kelebih agi ngagai rayat ke jelan penatai pemisi enggau seranta.
“Bantu tu endang pengawa perintah dikena ngamatka semaya sida ngagai rayat iya nya baka meri Baucher Bup 1Malaysia, Kedai Rayat 1Malaysia, Rumah Mesra Rayat enggau mayuh agi ke bukai,” ku iya.
Mawan ke mega nyadi Kaban Parlimen Saratok madah munyi nya rambau Program Kelai Nyuaka BR1M 4.0 renggat pelilih Saratok, di Dewan Sri Krian, kemari.
Ba renggat pelilih Saratok bisi 2112 iku orang dirintaika nerima BR1M 4.0 ini.
Ba taun keempat, BR1M ditikika ngagai tiga kategori iya nya RM950, RM750 enggau RM350, lalu iya diberi nengah dua chara iya nya dipasuk terus ngagai akaun penerima enggau ngena baucher.
Kenu ku Mawan, pengawa nyadung BR1M ngagai rayat tu endang lambang pemujur ketauai ke megai menua tu dalam nentuka menua tu terus pegari.
“Pengawa tu nunjukka ekonomi menua manah sereta kelai pemintar raban orang ke ngatur penatai pemisi menua tu.
“Perintah nemu serata dunya ke maya hari tu benung betapi enggau pemar ekonomi lalu menua kitai mega kena tempias, tang ekonomi kitai tegap bekau ari pengelantang menua ngujungka perintah muntang mantu rayat.
“Kitai nesau rayat terus besaup enggau pangan diri sereta seliahka diri ari nyereta pengawa ke ulih ngeriga pengelantang enggau meri pangka ngagai ekonomi.
“Semua orang megai tanggungpengawa mantu ngemansangka menua awakka menua Malaysia terus tegap ba sukut rama enggau ekonomi,” ku iya.
Nya alai, pengawa meri BR1M tu, ku iya dikearapka bala penerima ulih nguna iya enggau meruan.
“Guna duit bantu nya enggau meruan baka dikena meli barang ke beguna aja. Enti bedau deka nguna, simpan dulu nyadika penambat dudi hari,” ku Mawan.