SIZWE BLOSE
I BHANTSHI ligcwale umoya kumsakazi weMetro FM osematheni kulezi zinsuku ngokuzifaka obishini ngokukhangisa ngesiphuzo sakhe iMoFaya.
Izolo Isolezwe lithole ngomthombo walo othembekile ongaphakathi kulesi siteshi ukuthi uSbu Leope akafakwanga ohlwini olusha lwabasakazi nezinhlelo zabo okulindeleke ukuthi izikhulu zakulesi siteshi zizimemezele maduze.
USbu ubemisiwe kulo msakazo ngemuva kokwephula umthetho ngokungena esteji ezokwethula indondo, wafike wakhangisa iMoFaya kumaMetro FM Music Awards.
Umthombo , uthe yize lo msakazo ungaphumelanga obala ngesizathu esiholele ekutheni ingavuselelwa inkontileka kaSbu kodwa kusobala ukuthi kungenxa yesenzo sakhe.
Kulo mcimbi uSbu wangena noKhanyi Mbau esteji wagcina esememeza iMoFaya yize babeyaliwe ukuthi bangakhangisi ngemikhiqizo yabo uma sebengena esteji.
“Engikwaziyo wukuthi iMetro FM beyingazimisele ngokuhlukana ngisho noyedwa umsakazi wayo kodwa ukuziphatha kukaDJ Sbu kulo mcimbi nokungafiki emsebenzini ukuzobambela uTbo Touch ohlelweni lwantambama njengoba yena ayelungiselela ukuphatha uhlelo emcimbini, yikhona okumdonsele amanzi ngomsele,” kupotshoza lo mthombo.
Uthe uSbu nguyena kuphela ongeke abuyele yize kuzoba nezinguquko kulesi siteshi.
USbu uvelelwa yilezi zindaba ezibuhlungu nje, izolo uhlangane nesikhulu esiphezulu sephephabhuku i Forbes Africa uChris Bishop. Ufake isithombe ku-Instagram enaye emahhovisi abo wayesebhala ukuthi sebenesivumelwano esihle sebhizinisi nabakwaForbes, abacishe bamthathela izinyathelo zomthetho ngokusebenza kwesithombe sakhe ekhaveni yaleli bhuku ngendlela ewumkokotelo.
Umthombo uphinde wakuqinisekisa ukuthi lo msakazo uzojoyinwa ngumethuli wohlelo lwaku-SABC1 i Zaziwa, uPearl Modiadie. “Okunye engingakusho wukuthi noMo Flava uzoba ngomunye wabasakazi abasha abazojoyina iMetro FM.”
Ethintwa uHappy Ngidi okhulumela iMetro FM, uthe: “Engingakutshela khona wukuthi izikhathi zabasakazi zizoshintsha kakhulu, yilokho okumele bakulindele. Izinhlelo zangeSonto ngeke zithinteke kulolu guquko ngoba zenza kahle kakhulu ngokwezibalo zabalalelaleli.”