KUCHING: Ketuai Sekretari Politik Kepala Menteri Abdullah Saidol nyangkal ripot dalam portal berita ti nyebut randau royalti minyak enggau gis entara Perintah Nengeri, Perintah Besai enggau Petronas puntan.
Ku iya, ripot dalam portal berita nya kemari dipasuk pengudah Kepala Menteri Datuk Patinggi Tan Sri Adenan Satem bejaku ba pengawa bejadika Aum Orang Bekebun Mit enggau Pedagang Komoditi Renggat Menua lalu tau nusutka runding mensia mayuh.
“Ripot ke madah, randau royalti minyak ‘puntan’ jauh ari pengamat sereta tau nusutka runding rayat.
“Engka jaku ke dikena Kepala Menteri kelalu ‘canggih’ dipereti raban pemberita nya tang tebal agi sida ke datai ba pengerami nya ninga Kepala Menteri nguna Bahasa Melayu Sarawak ti mudah enggau terang,” ku iya.
Abdullah ke megai tanggungpengawa mantaika mosyen minta Perintah Besai nambahka bayar royalti minyak enggau gis nengah aum ba Dewan Undangan Negeri bulan Mei 2014 madah, Kepala Menteri semina netapka randau enggau Petronas ‘apin mujur’ lalu ukai ‘puntan’.
Iya ngerikod Adenan sempat bepantun maya bejaku:
“Nyiur Gading Puncak Mahligai,
Sayang Ketupat Berisi Inti;
Hancur Daging Tulang Berkecai,
Belum Dapat Belum Berhenti”.
Balat ngasuh kesal ku iya, penerang ari Kepala Menteri ti bebendar deka nentuka bayar royalti minyak enggau gis ditambah ngagai 20 peratus ari 5 peratus udah diputarbelit.
“Enggau nyemetak Kepala Menteri madah, randau nya bedau datai ba pengujung lalu iya deka majak berandau enggau Perintah Besai nyentuk teulihka juluk.
“Reti nya randau kitai bedau puntan munyi ke ripot. Bejurai sentang pengawa ke enda mujur, ke puntan iya nya randau sentang pekara ke bekaul enggau ai di Selangor sereta pengawa ti enda mujur ngamatka semaya di Pulau Pinang. Pekara ke bansa nya ke patut diripot,” ku iya.
Ku iya nambah, raban ti nusutka penerang sereta sengapa mansutka petenah ke jai ketegal ti deka ngirauka mensia mayuh patut dibenchi sereta anang dibai bekaban.
Sida munsuh penyerakup enggau pengelantang kitai.
Ngenang panjai sentang randau royalti minyak enggau gis, iya madah randau enggau Perintah Besai nya ukai semina sentang nambahka bayar royalti minyak ari Petronas.
“Kitai mega sedia nerima pemeri bukai baka tanggungpengawa rama korporat (CSR) ari Petronas ngambika tau nambah skolarship enggau latih teknikal sereta pekara dagang ungkup peranak Sarawak.
Engka numbuhka Universiti Petronas di Sarawak.
“Randau tu sebengkah proses ti enda ngetu lalu kitai patut ngembuan runding ke realistik sereta pragmatik,” tandu iya.