MIRI: Seiku apai nembiak Sekula Primari (SK) Anchi, ditu ngenataika kompelin madahka empat buah bilik kelas taun tiga sekula nya napi penanggul nadai bekal lekterik ke alai nembiak sekula ke belajar dalam kelas nya enda nyamai belajar ketegal ti kelalu angat kenyau ari bulan nyin tadi.
Apai nembiak ke beumur 50 taun nya madah, seiku ari anak iya belajar dalam kelas taun tiga ke napi penanggul nya.
“Opis Pelajar patut mansik sereta mutarka penanggul tu enggau lengkas ngambika nembiak sekula ulih belajar enggau lantang,” ku iya. Nitihka kompelin ke diterima, nembiak sekula ke belajar ba kelas nya napi penusah enda nyamai belajar beduduk ari penanggul tu kenyau ari bulan nyin tadi.
Ku iya, bilik kelas nya bisi disedika kipas tang nadai bekal lekterik pengudah bekal lekterik ke disambung ari bengunan kelas ke lama ngagai bilik kelas nya udah diketu piak bekuasa.
Ku iya nandu, pun bulan Januari tu tadi, semua bilik kelas nya nerima bekal kuasa karan. Tang dalam bulan Februari empai lama ke udah, bekal karan ngagai kelas nya udah diketuka.
Ninting pagi nembiak sekula ke belajar ba sekula nya napi penusah bilik kelas udu petang sereta enda tentu dipeda sebedau pukul 7 pagi.
“Nama kebuah bilik kelas ke alai nembiak belajar enda dikemeratka ari sukut pengelikun enggau pengelantang,” ku iya.
Menteri Muda Pengintu Pendiau Pelajar Tumu Anak Mit enggau Pemansang Ruang Bilik, Rosey Yunus lebuh ti ditanya bekaul enggau pekara tu besemaya deka ngenataika penanggul nya ngagai Opis Menteri Pelajar.
Ba awak ke sama, ku iya, raban apai indai ke ngembuan sebarang penanggul tau minta saup tauka kerejasama ari Gerempung Apai Indai Nembiak enggau Pengajar (PIBG) dikena mutarka sebarang penanggul ke ditapi.