Lapli i ede tenny dife konpletman Port Launay |17 February 2015

En pti pe lapli ki ti konmans tonbe tar yer apremidi in ede anmenn enpe soulazman pour tou bann manm servis dirzans ki ti enplike pour konpletman tenny sa dife ki ti pe brile dan leo Port Launay depi Sanmdi swar.

Dimans apremidi, Minis pour Lanvironnman, Lenerzi ek Sanzman Klima Msye Didier Dogley ti lo teren li osi pour vwar sa sitiasyon e i ti eksprim son konsern lo sa sitiason dife ki i dir pa normal pandan sa sezon lannen.

Menm si dife ti’n ganny  deklare tennyen Dimans swar, yer bomaten plizyer manm bann lotorite konsernen enkli serten volonter distrik Port Glaud e osi Divizyon Risk ek Zesyon Dezas (DRDM) ti retourn ankor lo teren pour al vwar sitiasyon, pas partou pour verifye si napa labrez ki pe realimen e fer mopping up  dapre Msye Paul Labaleine, direkter zeneral DRDM.

Msye Labaleine ti dir ki sa lapli in ede pour tenny konpletman bann dernyen pti labrez.

Lo son kote portparol Servis Tenny Dife ek Sovtaz, Msye Jones Madeleine, ti dir ki zot ti bezwen deplway 2 lekip ver 3er50 yer apremidi apre ki zot ti’n ganny rapor ki dife ti pe repran me ler zot ti ariv lo teren sitiasyon pa ti osi grav e alor zis en group ki ti mont dan leo pour al tenny sa bann labrez ki ti pe realimen.