Nouvo kouvertir pli dirab pour legim meyer kalite |30 January 2015

Jacques Matombe, en fermye dan plato Anse Royale, pe fer bann diferan lesey plant en varyete legim anba de nouvo kalite kouvertir ki in fek entrodwir.
Sa bann kouvertir -- en bio-net ek en virus net -- in fer avek bann materyo tre solid ki pa desire dan divan e ki fermen konpletman ki fer ki i pa bezwen servi okenn pestisid pour aroz son bann plant.

Sa de kouvertir zot ganny monte lo bann striktir galvanize antere dan en pti fondasyon siman. Sa bann striktir ek bann fil osi galvanize i vin tou ansanm e ganny monte sirplas. Zot grander ek larzer i depan lo teren ki en fermye i annan.

Bann legim ki ganny plante anba sa de kalite kouvertir zot ganny proteze kont gro lapli ek zensek e zot kalite ek gou i natirel e pli siperyer. Limidite ek lasaler i osi ganny kontrole anba la.

Depi milye lannen pase Msye Matombe in entrodwir sa bann kouvertir ki sorti Izrael e in ganny lasistans en enzenyer sorti kot sa menm lakonpannyen pour ed li met zot an plas.

Msye Matombe i dir in deside entrodwir bann tel kouvertir dan lesey pour prodwir bann legim ki meyer kalite.

“Avek bokou konsern konmkwa fermye pe servi tro bokou pestisid ek langre i annan  bokou kestyon ki leve lo si bann fri ek legim ki nou pe manze pa pe ede koz logmantasyon dan serten maladi parey kanser. Mon kwar si rannman i vreman bon mon pou kontinyen plant anba la e sa i ava fer ki mon bann kliyan ava ganny bann legim meyer kalite,” Msye Matombe i dir.

“Mon bi se asire ki alavenir nou annan en marse avek bann legim ki antyerman pous avek langre organik e san pestisid e sa pou fer nou fermye benefisye plis akoz nou pa pou aste kemikal,” Msye Matombe i dir.

Menm si i pa ankor fini fer bann lesey avek diferan legim Msye Matombe i dir ki en karo sou ki i ti plant anba sa bann kouvertir in fer tre byen e i satisfe avek kalite ek rannman ki in gannyen.

Merkredi bomaten en group fermye sorti dan diferan distrik ansanm avek bann zofisye lagrikiltir ti vizit Msye Matombe lo son laferm kot i ti eksplik zot lavantaz sa de kalite kouvertir ek benefis ki zot pou anmennen akoz zot pa kout ser pour enstale e lo kote lasante osi byen ki dan kalite legim rannman pou osi gran.

Bann fermye ki ti la ti vreman apresye bann leksplikasyon e zot tou zot in montre gran lentere dan sa kalite kouvertir ki osi pli dirab.

Zot ti annan bokou kestyon e anmezir ki i ti donn zot leksplikasyon Msye Matombe ti osi fer zot vizit bann plant parey bred soudsin ki pres pour bon pour rekolte anba sa bann kouvertir.