Sekula anang peneka ati nempa atur ti tau ngenataika mayuh penusah
KUCHING: Berita seiku nembiak indu Tiga, Britney Nicole, ti madahka diri ditagang tama ngagai SMK Seri Mutiara di Cheras ketegal ngena baju kurung tau dikumbai ‘un-Malaysian’, pia ku sapit presiden SPDP, Datuk Nelson Balang Rining.
Iya madahka Britney, bebansa Lun Bawang ari Long Semadoh, Ba’Kelalan diau enggau ibu iya di Kuala Lumpur.
“Aku bisi bejaku enggau ibu iya lalu arapka penyaru nya enda betandu agi laban tau ngenataika penusah ngagai bansa kitai ti ditebilang enggau ulah ke bisi basa sereta ulih bebatak asur penemu,” ku Balang madah ngagai The Borneo Post ensanus.
Balang mega madahka diri bisi nganjung bantu belanja ngagai Britney ngambika bisi dikena iya meli ngepan sekula ke baru.
Kena Hari Tiga minggu nyin tadi, madahka diri diberi jaku lalau ti ke penudi endar, ke alai iya enda dikemendarka tama ngagai kelas enti enda ngena baju pinafor.
Nangkanka ripot nya, Menteri Opis Pelajar, Tan Sri Muhyiddin Yassin ba aum pengarang berita di Kuala Lumpur madahka iya udah ngemansutka surat lalau ngagai sekula nya ngambika enda nempa sepeneka ati undang- undang ti nadai kemendar ari Opis Menteri Pelajar.
“Nadai undang-undang bisi dikeluar ngagai sekula ti minta sida nagang nembiak ukai Islam ngena baju kurung. Opis Pelajar nadai kala nagang nembiak ukai Islam ngena baju kurung.
“Sekula anang peneka ati neritka undang–undang ti enda dikemendarka laban pekara tau ngenataika mayuh penusah,” pia ku Sapit Kepala Menteri nya.
Lebuh ke ditanya bekaul enggau pekara politik, Balang ke mega ex-Kunsil Nengeri Ba’Kelalan pechaya iya ulih ngerampas pulai sitak nya ari penyakal maya PRN dudi tu ila, enti sema iya dipilih nyadi chalun BN.
“Penyakal semmina nemu bejaku aja, tang nadai gawa. Laban Ba’Kelalan diatu ari baruh pegai penyakal, rayat ditu rugi urung RM6 juta laban ti enda nerima ungkup belanja Projek Mit Pemansang Menua Pesisir (MRP),” ku iya.
Taja pan iya ukai agi pengari rayat sitak nya, tang Balang madahka diri mengkang mantu rayat nengah mayuh macham chara nyengkaum nyadung beg sekula ngagai nembiak primari Enam ujung minggu seiti nyin tadi baka di SK Ba’Kelalan, SK Long Semadoh, SK Long Luping, SK Long Sukang, SK Long Sebangan enggau SK Long Tuma.
Ba Pengawa Bepilih Kunsil Nengeri 2011, Balang enda dichalunka BN bepilih ba sitak nya ke alai Chairman PKR Nengeri, Baru Bian udah menang mipis nengah majoriti 473 iti undi ngalahka chalun BN, Willie Liau.