Zofisye lanrezistreman eleksyon i sermante |10 January 2015

• Lenspeksyon rezis voter i konmanse Lendi le 12 Zanvye

Onz zofisye lanrezistreman in pret serman devan Komisyoner Eleksyon, Msye Hendrick Gappy.

Sa ti pandan en pti seremoni ki ti deroul kot Biro Komisyon Eleksyon dan batiman Aarti Chambers yer apremidi.

Sakenn sa bann zofisye pou responsab de distrik elektoral lo Mahé, pandan legzersis lenspeksyon e lanrezistremen lo rezis voter ki pou deroul ant le 12 e 29 Zanvye sa lannen. Dan ka okenn lobzeksyon, en voter pou kapab soumet en laplikasyon avek Biro Komisyon Eleksyon.

Msye Gappy in eksplike ki rekritman e sermantasyon bann zofisye lanrezistreman i neseser anba Lalwa Elektoral ki egzize ki lanrezistreman voter i komanse avan le 15 Zanvye sak lannen.

Menm si nouvo Lalwa Elektoral ki’n fek vote par Lasanble Nasyonal i demande ki rezis voter i reste ouver pandan lannen antye, Msye Gappy in dir ki sa lalwa pa ankor vin efektiv. Sa i akoz en peryod tranzitwar i neseser pour Biro Komisyon Eleksyon kapab met bann lozistik anplas.

Dan labsans en sef zofisye lanrezistreman depi ki Madanm Jenny Adrienne in demisyonnen e ki Komisyon Eleksyon i ankor pe rod son ranplasan, Msye Gappy pe limenm antretan antreprann sa responsabilite.

Msye Gappy in profite pour remersye Madanm Adrienne pour son bon servis.

Komisyoner Eleksyon in antretan anonse ki son biro pe travay lo bann nouvo balizaz elektoral pour fer bann distrik vin pli balanse an term popilasyon. Sa i enkli konsiderasyon pour fer Zil Perseverans, ki konmela tonm dan Rivière Anglaise, vin en sirkonskripsyon dan limenm.

Sa seremoni pret serman yer i swiv enn ki ti fer lo Praslin Zedi pour trwa zofisye ki pou respektivman responsab sant lanrezistreman Baie Sainte Anne e Grand Anse lo Praslin e osi La Digue.

Dapre Konstitisyon, nouvo eleksyon prezidansyel i devret fer ant Fevriye e Avril 2016, tandis ki limit letan pour eleksyon lasanble nasyonal i ant Out e Oktob 2016.

Nou pibliy lalis bann zofisye ki pou responsab bann diferan biro lanrezistreman pour sa lannen :

Geralda Didon (Anse aux Pins/Au Cap), Sylvia Alcindor (Anse Boileau/Baie Lazare), Alex Souffe (Anse Etoile/Glacis), Joseph Adela (Anse Royale/Takamaka), Michel Mellie (Bel Air/St Louis), Jerry Souris (Beau Vallon/Bel Ombre), Menah Dubignon (Baie Ste Anne Praslin), Ronnie Gayon (Cascade/Pointe Larue), Dora Ernesta (Rivière Anglaise/Mont Buxton), Giselle Tirant (Grand Anse Mahé/Port Glaud), Linda Languila (Grand Anse Praslin), Noline Sophola (Zil pros), Bernadette Julie (Les Mamelles/Roche Caïman) e Myriam Telemaque (Mont Fleuri/Plaisance).