VP i remersye bann travayer Vijay |08 January 2015

Vis-Prezidan Danny Faure ti yer bomaten remersye en group 15 travayer Seselwa ki’n pas plis ki 25-an dan lakonpannyen Vijay Construction, e remet zot en pti tokenn lapresiasyon pour zot long e bon servis.

Sa ti pandan en pti seremoni State House dan prezans Minis pour Lanplwa ek Devlopman Resours Imen Idith Alexander ek direkter egzekitif Vijay Construction Vijay Patel.

De parmi sa 15 travayer Seselwa, Paul Louise ki en sarpantye e Rolland Estico, en mekannisyen e drayver gro masin, in pas 34-an avek sa lakonpannyen.

Zot dir ki malgre difikilte parfwa, se satisfaksyon ki zot gannyen e bon lantant avek zot anplwayer ki’n fer zot reste sa kantite letan dan menm travay.
Zot azoute ki dan travay ou pa devret mazin zis larzan me ki ou devret plito satisfe avek sa ki ou fer.
Zot in menm promet pour reste e kontinyen travay ziska zot pran zot retret.

Kat lezot anplwaye – Maxime Adelaide, Yvon Boniface, Daniel Servina e Jerina Songoire – in travay pour plis ki 30-an avek Vijay Construction.

Nef lezot in dan sa lakonpannyen pour plis ki 25-an. Sa i Eddy Thyroomooldy e Linda Meme (29-an), Philip Hollanda, David Zialor, Daniel Larue e Norbert Volcy (27-an), Pascal Jean (26-an), Eddy Laurette e France Rachel (25-an).

Minis Alexander in dir ki sa zes ki gouvernman in fer anver sa bann travayer i antre dan kad kolaborasyon ant sekter piblik ek sekter prive ki son minister pe ankouraze.

In azoute ki menm si zot pa dan servis piblik, sa bann travayer in kontribye bokou dan sikse zot lorganizasyon e dan lekonomi pei.
In asire ki son minister i met bokou lanfaz lo zestyon resours imen pour fer ki travayer i reste dan zot pos.

Dan sa konteks, minis in felisit Vijay Construction pour son bon pratik.

In lans en lapel avek lezot lakonpannyen prive pour swiv legzanp Vijay e obzerv bann bon pratik resours imen.

«Zestyon resours imen i lakle pour fer en lorganizasyon marse. Fodre ou tret ou travayer byen pour zot reste,» i ti dir.

Minis Alexander in dir ki lefe ki en gro group travayer in reste si lontan dan en lakonpannyen konstriksyon i montre ki i annan sifizaman travayer Seselwa serye ki kapab travay dan sa sekter osi dan lezot lendistri.

Lo son kote Msye Patel in dekri sa resepsyon State House konman some oubyen kouronnman karyer sa bann anplwaye.

In azoute ki napa sekre ki fer travayer reste lontan dan son lakonpannyen, me ki i plito annan sa dezir pour travay ansanm e konpran kanmarad.
In dir ki i donn loportinite son bann travayer e se sa loportinite ki motiv zot pour reste.

I bon note ki Sanmdi pase sa lakonpannyen ti organiz en seremoni pour rekonpans son bann travayer avek long letan servis.