«Mon Kontan Sesel!» |07 January 2015

En patriot i imortel akoz i fer bann bon keksoz nob pour son pei. I pare pour sakrifye son lekor pour son pei. E se sa ki nou apel patriotizm.

Si nou dir nou kontan nou pei, nou bezwen kapab pare pour defann li, pour siport li a tou moman, dan tou sirkonstans e dan nenport landrwa kot nou ete.

Se pour sa rezon ki Prezidan James Michel in swazir en tenm patriotik «Mon Kontan Sesel!» pour lannen 2015.
Si nou dir nou en patriot, nou bezwen mazin nou pei avan nou prop lekor akoz nou tou nou bezwen kontribye pour fer avanse nou pei.

Alor annou pa demande ki nou pei i kapab fer pour nou, me plito demande ki nou kapab fer pour nou pei. Se sel fason ki nou konman en pep nou a kapab bouz an avan akoz nou pe annan en panse pozitif anver konstriksyon nou pei.

Dan son mesaz pour lannen 2015, Prezidan Michel in dir ki Sesel i vreman spesyal e ki nou en pti pei avek gran lanbisyon.
«Plis ki zanmen nou linite ek nou koezyon nasyonal i reste endispansab,» Prezidan Michel i azoute.

Prezidan Michel in dir ki sa tenm pou kontinyen inifye nou dan nou diversite.
«Mon swete ki, okour nouvo lannen 2015, plis lanmour pour nou pei i enspir nou dan tou sa ki nou fer. Annou proklanm fyerman pour lemonn antye tande sa ki nou ete konman en nasyon. En pep ki anpe avek limenm e avek leres lemonn. En pti nasyon ki pe sanpyonn avek asarnman proteksyon lanvironnman, lakoz bann pti leta zil an devlopman, ek lemerzans Lekonomi Ble,» Prezidan in dir.

In osi demann nou pour pandan sa lannen «Mon Kontan Sesel!» apresye plis sa ki nou annan dan nou pei e kontinyelman mobiliz nou zefor pour progre.

«Annou pratik nou demokrasi dan respe leta-de-drwa, dan lespri tolerans e linite nasyonal. Annou pa les nou diverzans ek nou diferans diviz nou. Annou aprann nou zanfan fer parey.  Tenm sa lannen i anglob tou sa ki pli ‘cher’ pour nou konman en nasyon. Touzour ini, solider, travay ver en sel bi, pour plis sikse.
 Sa tenm a enspir e motiv nou fer ankor plis – e pli byen – pour nou Sesel, pour lanmour Sesel,» Prezidan Michel in demann tou Seselwa.
Nou tou nou kontan letan i annan bann bon keksoz ki arive dan nou pei, e nou bezwen ois kontan nou pei pandan bann moman difisil. Nou pei i bezwen nou tou.

Alors si nou vreman kontan nou pti Sesel ki annan en gran lanbisyon, annou koste zepol ansanm, travay dir pour sa Sesel – ki nou tou nou apel en perl dan losean.

Bon Dye in beni nou avek nou pei Sesel alors nou devret touzour kontan li e defann li ...