SIBU: Projek bekal ai Tanjung Manis Fasa I di Jalai Kwong Hua/Sungai Sadit benung dikemujurka tujuh konteriktor ke udah dipilih.
Nitihka penerang ke dipansutka Opis Ai Sibu ensanus madahka, projek ke ngambi timpuh 24 bulan nya dipejalaika berengkah November 2013 lalu dipelabatembu November 2015.
Menteri Muda Rengka Rama (Bekal Air) Datuk Sylvester Entri Muran bisi datai ngabas projek nya kena 8 Disember tu tadi.
“Pengawa ngemujurka projek tu benung dipejalai lalu agi bisi sekeda pekara ke patut diputar. Naka tu, endang nadai penanggul.
“Taja pia, isu mit deka diputar besaup enggau ejensi perintah ke bekaul,” ku iya.
Kenu ku Entri, gaya projek nya digaga endang nitihka atur, taja pan napi sekeda penanggul mimit bepun ari palan projek ke nadai disadang balat tusah endur ngereja pengawa.
“Taja pia, raban pengatur pengawa udah milih chara bukai dikena mutarka penanggul nya dikena nentuka projek tu ulih tembu nitihka atur ke udah disemaya,” ku iya.
Nitihka penerang mega, renggat pengawa ke udah mujur digaga ba tujuh pakej projek tu iya nya 40.37 peratus.