NONHLANHLA MKHABELA
S EKUVULIWE ukungenela amaRoyalty Soapie Awards (RSA) esibili azoba seNkosi Albert Luthuli Convention Centre, eThekwini, ngoMashi 28.
Ukungenela okuvuleleke kuyona yonke imidlalo yakuleli ewuchungechunge kuqale ngoMsombuluko kuzoze kuvalwe ngoNovemba 28.
AmaRSA, asungulwe ngumlingisi obedlala ku Generations esamisiwe kuthelevishini, uWinnie “Khethiwe” Ntshaba, asengeze iqoqo elisha i-Outstanding Audio.
Amaqoqo awo ehlukaniswe kabili.
KunePerformance Category ngaphansi kwayo okukhona i-Outstanding Lead Actor, Outstanding Lead Actress, Outstanding Male Villain, Outstanding Female Villain, Outstanding Soapie, Outstanding Supporting Actor, Outstanding Supporting Actress, Outstanding Couple ne-Outstanding Newcomer.
Kuphinde kube neTechincal and Creative Category ngaphansi kwayo okukhona i-Outstanding Make-up & Hair, Outstanding Set Design, Outstanding Writing Team, Outstanding Wardrobe, Outstanding Art Direction, Outstanding Directing Team, Outstanding Editing Team, Outstanding Audio, Outstanding Casting Director ne-Outstanding Lighting.
Imiklomelo yokuqala okwakumele ibe ngoNovemba 2013 yayihaqwe yizinkinga kangangokuba yaze yahlehliselwa uMashi wanonyaka.
Kwaphinde kwabhuntsha nezinhlelo zokuyikhombisa kuthelevishini ngosuku olulandela olomcimbi waze wakhonjiswa sekudlule inyanga yonke.
Umdlalo weMzansi Magic owaqala uyi-telenovela kodwa waphendulwa waba wuchungechunge, Isibaya, ugile izimanga kule miklomelo uwola izindondo eziwu-10 emaqoqweni awu-18 obuqokwe kuwo.
Phakathi kwalezi bekungeye-Outstanding Lead Actress eyatholwa nguThembi Nyandeni olingisa indawo kaMkabayi neye-Outstanding Lead Actor etholwe nguSiyabonga Twala olingisa uMpiyakhe Zungu.
I Generations, obekulingisa kuyona umsunguli wemiklomelo uWinnie, ayitholanga lutho.
I Binneland imangaze abaningi ikhala yemuka neMost Popular Soapie of the Year.
Imidlalo ye-e.tv ayizange iyingenele imiklomelo ngoba abayiphethe bekhala ngokuthi abanikwanga ulwazi olwanele ngohlelo lokuhlunga kanti nabaphethe i Zabalaza ne Nkaba nabo benqaba ukungenela.
Umcimbi wangoMashi ubuphethwe ngumlingisi uHlomla Dandala nomethuli wezinhlelo kuthelevishini, uMichael Mol, kwanandisa iMafikizolo, Somizi Mhlongo no-Ian Von Memerty.
Umcimbi uxhaswe wuMnyango wezobuCiko namaCiko KwaZulu-Natal nakuzwelonke, iSMG BMW kanti ukucwaningwa kwamavoti kwenziwa yinkampani iKPMG.