KE PENGINGAT: Dennis Ngau (duduk ba tengah) begambar enggau bala VIP bukai. Ari kanan Saging Laing, Pengulu Jalong Tanyit, Mbuang Mensan enggau Jalong Wan.
MARUDI: Nembiak sekula primari patut nemu pemesai reti guna pelajar ba pengidup sida jemah ila. Nya alai sida patut chakah belajar sereta ngembuan juluk pemadu nadai bulih diploma ngambika mudah agi bulih kereja sereta begaji besai dikena ngubah tikas pengidup sida sebilik.
Dennis Ngau ke mega Kaban Kunsil Nengeri (ADUN) Telang Usan ngelalau peranak menua pesisir ngambika sebuah ruang bilik nempa pemadu nadai seiku graduet ari Universiti.
“Ari tiap ruang bilik, kitai deka meda abis nadai pan seiku bulih diploma tauka tinggi agi laban nya ulih ngubah pengidup ruang bilik jemah ila,” ku iya
Iya bejaku munyi tu lebuh bejadika Lumba Darat ba SK.Long Makabar, ulu Baram empai lama ke udah.
Lebuh ke ngenang pasal lumba darat nya, iya madahka diri berasai gaga endar ati ati laban bala atlit udah mandangka penyakah enggau disiplin deka nyapai juluk sida. Kelimpah ari nya, lumba nya ukai semina nempa pemujur ba bidang lumba enggau main tang manah ke pengerai.
Nengah awak nya, iya nyuaka pemeri sama bela RM3,000 ngagai SK.Long Jeeh, SK.Long Jekitan enggau SK.Long Makabar ke sama bela bisi enggau ngambi bagi ba lumba nya .
Sama bisi ba pengerami nya Kepala Pengajar ke mega Chairman pengatur lumba Zon Silat, Mbuang Mensan, Sapit Pemesai Opis Pelajar Pelilih Mit Baram, Jalong Wan @ Ugak Wan, Pengulu Jalong Tanyit enggau bala Kepala Pengajar ari sekula ke bisi ngambi bagi ba lumba darat nya.