MIRI: Presiden Parti Tenaga Rayat Sarawak (TERAS), Tan Sri William Mawan Ikom ningkah penemu sekeda orang ke nabur jaku petenah ngumbai parti TERAS sebengkah ari parti penyakal.
Nitihka penerang Mawan, parti TERAS ukai sebengkah parti penyakal tang sebengkah parti dibaruh Barisan Nasional (BN).
“Jaku petenah ke ngumbai parti TERAS sebengkah ari parti penyakal nya semina chara dikena bejai sereta ngerusak kaul ti manah ke dikembuan raban dalam parti tu,” ku Mawan.
Iya mansutka jaku nya lebuh nemuai ngagai Rumah Pilet di Sungai Spat, Saeh Putih, Niah.
Mawan ke mega Menteri Pemansang Rama minta rayat ke diau di rumah panjai nya terus meri sukung penuh ngagai Kaban Kunsil Nengeri (ADUN) Bekenu Rosey Yunus ke nyeretai parti TERAS.
Rayat ke diau di rumah panjai nya bulih mayuh penguntung enggau pemansang ke diberi perintah Barisan Nasional nengah Rosey.
Nya kebuah rayat patut nyukung parti TERAS ke sebengkah parti BN, ku iya nandu.
Mawan madah, menua Saeh agi ngembuan mayuh pengurang sereta patut diberi pemansang nyengkaum kuasa karan.
Iya besemaya deka meri agih belanja beungkus RM30,000 ngagai rayat di menua nya dikena mutarka penusah ke ditapi sida.
Beserimbai enggau penemuai nya, Mawan diuluka Kaban Kunsil Nengeri (ADUN) Marudi Datuk Sylvester Entri Muran, ADUN Tasik Biru Datuk Peter Nansian Ngusie, ADUN Bekenu Rosey sereta ADUN Batu Danau Paulus Gumbang.
Kelimpah ari nya, Nansian, Entri enggau Rosey bela madahka diri deka meri ungkus belanja Projek Mit Pemansang Menua Pesisir (MRP).
Rosey meri MRP penyampau RM20,000, Nansian (RM20,000), Entri (RM20,000) enggau Paulus meri RM10,000 ungkup menua Saeh.
Tuai Rumah Pilet enggau peranak rumah panjai nya mantaika pengaga ati sida berindik ari pemayuh pemeri nya.