Sirkilasyon trafik dan Viktorya i ekspekte amelyor ankor |22 July 2014

Sirkilasyon trafik dan lavil Viktorya i ekspekte amelyor ankor enpe plis byento la ki Lazans Transpor lo Later (SLTA) i annan plan pour azout en nouvo lane lo Laveni 5 Zen.

Tender pour konstriksyon sa morso semen in deza lanse e dapre bann zofisye SLTA si tou i al dapre plan sa proze i ekspekte konmanse ver milye mwan Septanm.
Bi sa proze se pour redwir konzesyon trafik sorti dan Nor pour al dan Sid, sirtou dan bann moman kot i annan plis trafik lo semen.

Pour enplimant sa proze, lespas pou ganny pran lo toulede kote semen Laveni 5 Zen dan en fason ki en trwazyenm lane a kapab ganny konstrir.
Atraver konstriksyon sa trwazyenm lane, pou annan 2 lane ki pou sorti direksyon Nor ziska anvil e en lane ki pou sorti direksyon anvil ziska dan Nor.

Sa proze i ekspekte ganny fer an 2 parti. Premye faz pou sorti kot ronpwen English River ziska lalimyer trafik kot Palm Street, e dezyenm faz pou depi lalimyer trafik kot Palm Street ziska ronpwen Laveni Lendepandans.

Dapre sef egzekitiv SLTA, Msye Parinda Herath, sa proze i form parti en pli gran plan pour mye zer trafik dan lavil Viktorya  (Victoria Traffic Management Plan).

Antretan lenvitasyon pour bann tenders i ankor ouver e i pou reste ouver ziska 10er bomaten, Merkredi le 6 Out 2014.

Msye Herath in fer resorti ki dimoun ki enterese pour fer laplikasyon pour sa proze zot merit preferableman bann kontrakter ki annan masin ek lekipman neseser pour sa kalite travay, annan ase travayer ki pare pour travay apre ler ek wikenn vi ki sa travay i demann bokou e pa pou neseserman kapab fer dan ler travay normal.

I ti osi dir ki fodre bann kontrakter zot annan bann bon mezir proteksyon e prodwi en travay o nivo.
Dapre SLTA zot annan ankor proze dan le fitir pour kontinyen amelyor sirkilasyon trafik dan lavil, me ki zot ankor pe travay lo en plan afen ki i ava enn ki pli efektiv.