KELAI PENYINU: Seiku ari peranak menua ditu benung nyain ba kain tambai dikena ngenang penyinu ba pengelebang bilun MAS MH 370.
SRI AMAN: Konsulat Menua China ke Malaysia, Liu Quan entara beribu iku temuai ke udah ngengkahka sain jari sereta nujuka jaku pesan nengah Program Ngulihka 1,000 sain jari enggau jaku pesan ngagai penumpang sereta raban bilun MH 370 ke udah lenyau kenyau ari 8 March tu tadi.
Liu enggau raban iya udah nemuai ngagai Tepikong China di Sri Aman, berasai gaga endar ati enggau program nya lalu nyain sereta nujuka jaku pesan ngagai penumpang enggau raban bilun MH 370 ke mengkang lenyau.
Penemuai iya ngagai program nya disempulang Chairman Gerempung Soon Heng Simanggang, Datuk Tan Chong Meng enggau bala kaban gerempung nya ke bukai.
Program nya diatur Unit Rama, Opis Residen Pelilih Sri Aman enggau Komiti Pemansang Nembiak, Bagi Menua Sri Aman, berengkah pukul 7.30 pagi ba Tebing Sungai Batang Lupar, Sri Aman ditu.
Sapit Residen Pelilih Sri Aman, Hamdan Katang madah, sida arap teulihka 1,000 iti sain jari ari mensia mayuh di Sri Aman, kelai meri sukung ngagai ruang bilik enggau penumpang sereta krew bilun nya ke mengkang enda temu alai.
“Taja pan kitai jauh ari ruang bilik penumpang enggau krew bilun nya di Semenanjung, tang kitai ditu seruran meri sukung ari segi peransang nengah program ke diatur kitai tu,” pia ku iya.
Kami ditu arapka sukung ari rayat di Sri Aman ke sama bela enggau nyain, nyadika kelai meri peransang ngagai sida ke dituntung penusah nya.
Berebak enggau nya, mensia mayuh ke ngulu sereta nurunka sain jari sida ba kain tambai ti disediaka raban pengatur nya, madahka diri berasai sinu endar ati ke pengelenyau bilun MH 370 ti mengkang bedau temu sepengudah teputus kaul enggau Palan Pengemata di Subang kena 8 March tu tadi.
“Kami ditu ngarapka bilun MH 370 ditemu sereta selamat dibai pulai ke Malaysia, lalu penumpang raban bilun nya mega ulih mulaika diri ngagai sida sebilik,” ku iya ti enggai nama iya dibantaika ditu.
Sama bela enggau meri sukung ba program nya, Presiden Simanggang Benak Riders Club (SBRC), Jamali Safri.